قارا گونئی

"سن آدیی یازموشه ی؟" یایین سون گونلرینده او زمانلار بیربیریمیزدن سوروشدوغوموز سورغولاردان بیری ایدی. پاییزین اولینده مدرسه یه گئده جییک. نه مدرسه بیزی سوسدوران یئره. 60 ینجی ایل ایلک مدرسه یه آیاق باسدیغیم گونلر، معلمیمیز کردرلی اسفندیار فرهادبیگی ایدی. اوزمانلار مرغئی ده معلمی، مدیری و هر درس وئرنی آقامودور چاغیراردیق. فرهادبیگی قونوسو باشقاایدی. چونکو او قونشو کنددن ایدی و آتالاریمیزین چوخوینان یولداش ایدی. ایلک آیلار هم معلمیمیز، هم مدرسه نین رئیسی ایدی. بیله سینه چوخ باغلی اولموشدوم. درسدن نئچه آی گئدندن سونرا اونون یئرینه بیر خانوم معلم گلدی و من داها درسه گئدمک ایسته مه دیم. ننه م، قاقام، فرهادبیگی و ... منی بیرچوخ خوشماخوشاللاتدیقدان سورا بالاخره بو شرطینن کی گنه فرهادبیگی معلمیمیز اولا مدرسه یه قئییتدیم. من کلاسا قئیتدیم آما معلم دگیشمه دی.

مدرسه ده ایل لر گلدی گئچدی و بیز ایل لر بویو علم اؤرگنمک یئرینه دیل اؤرگندیک و قورخوموز شفاهی ایمتحانلاردان ایدی. چونکو اوردا دانیشاجاغیدیق و اؤزگه دیلده مجبور حالدا دانیشماق نه زور. تازا من بؤلگه نین بیرینجی شاگیردلریندن ایدیم.

29 ایل او گونلردن گئچیب. هله دیلیمیز آچیلماییب. بیر شی دگیشیب آنجاق. ایندی کی مدرسه یه گئدنلر آنجاق ایکی دیللی بیلیرلر اؤزلرینی شایدده بیر دیللی. آنجاق هئچ بیریسی دگیللر: دانیشاندا "کاسه" یه "بایداچه" و "طالبی" یه " طالبو" دئییرلر.

آچیقلاما: بایداچه سؤزجوگونو بیر گون بیر "بیله سی اینن فارسجا دانیشیلمیش اولان" قیز اوشاغی بایداچا و کاسه یئرینه ایشلتدی. طالبو سؤزجوگونو نئچه ایل مدرسه یه گئدمیش اولان(بیله سی اینن تورکجه دانیشیلمیش) اوغلان اوشاغی طالبی(= تورکجه: طالوبو) یئرینه ایشلتدی . هر ایکی اوشاق مرغئی لی دیرلر.