قارا گونئی

اوغلوم دئییر: بابا نه دن مردم زنگ وورمادیلار پلیسه، پلیس گله امام حوسئینین دوشمنلرین آپارا؟ گؤزلریم دولور. جوابینی نه وئره جگیمی بیلمیرم. بیر تورلو بیله سینی قانع ائتمگه چالیشیرام. اؤزوم عاشورا خاطیره لریمه دؤنورم. ایلک سؤز آتامدان یادیما دوشور: اسدالله منیم آدیمی عباس قویوب. بو بند شبیه شعرلرینین بیر بندی دیر، بیلمیرم هانسی نسخه دندیر: درگزین یوخسا ازبیزان یوخسا باشقا بیر نسخه دن. سونرا مرغئی ده، ساوادا، اورمیه ده، تهراندا قاتیلدیغیم هیئت لره دؤنورم. بعضی شعرلری آغلایا آغلایا زمزمه ائدیرم: سلیم موذن زاده دن، ای منی آواره قویان ابالفضل، داود علیزاده نین تهراندا چهارراه عباسی ده، انصارالحسین مچیدینده اوخشادیغی: قولسوز گؤروب عباسی گئدنلرده قاییتدی، مرغئی ده سسلندیگیمیز: گل حوسئن یاتدی ابالفضل عَلَمی- قوی گؤزوم اوسته مقدس قدمی. بیر آز دوشونورم، سونرا یئنه اوغلومون سورغوسونا چاتیرام: نیه مردم ...؟