کیم حیلله سویا سالیر؟
بو گونلرده تورکییه کاناللاریندا چوخ ائشیدیلن سؤزلردن بیریسی " حیله" کلمهسیدیر. او کاناللار ایرانداکی سئچگیلری ایزلهییب و اوندان راپورلار یاییرلار. اونلار سئچگیلره وئریلن تقلب ادعاسینی، "حیله" سؤزجوگو ایله آنلاتیرلار.
ساوا بؤلگهلرینده آلداتماق و فریب وئرمک آنلامیندا "حیلله سویا سالماق" دئییمی قوللانیلیر. بو دئییمی رحمتلیک آنام چوخ ایشلهدردی. بیزیم بعضی دئییملریمیزی فارسجایا چئویرنده ایلگینج اولور. اؤرنک ایچین همین بو دئییمین فارسجایا چئویریشی بئله اولار: حیله در آب نینداز= حیلله سویا سالما.
اورمودا اولان زامان خییاولی بیر دوستوم تورکجه اولان "پیشیک بزهمک" دئییمینی فارسجا دانیشاندادا بئله ایشلهدردی: فلانی! گربه آرایش نکن= فلانی! پیشیک بزهمه.
سئچگی اولایلاریندا آخیردا بیلمهدیک کیم پیشیک بزهییر، کیم حیلله سویا سالیر؟
سایین بایات بعضی یازیلاریندا یازدیغی کیمی؛ یازیدان سونرا:
1- دوستلارین بیریندن اؤیرندیگیم بیر بیلگی سانیریم اوخوجولارا یارارلی اولا: دئییم و آتالار سؤزو آراسیندا اؤنملی بیر فرق وار: دئییم صرف اولار آمما آتالار سؤزو صرف اولماز.
2- دئییم= اصطلاح، آتالار سؤزو= سؤزگلیشی؛ ضربالمثل.
3- بو گونلرده بیرده آیری "دئییم" کلمهسی ده مود اولموش کی اونون فارسجاسی "بگم؟" دیر.
+ نوشته شده در شنبه بیستم تیر ۱۳۸۸ساعت توسط اسدالله امیری
|
دونیانین بیر چوخ یئرلرینه سَُپَلنمیش مرغئی لی لره آرمان اولسون:
سؤيلهين: ساراي خاتون اميري-44 ياشيندا
يازان: اسدالله اميري
چؤرک ياپموشام تازا
گئدمِري اليم آزا
هر يئره گئديب سرباز
کؤمگ اول ايمام رضا
*****
قوز آغاجو دئگيلم
هر گلهنه اگيلم
اگيل يوٍزييدن اؤپوم
من اؤزگهسي دئگيلم
*****
ککليک نانادان چيخدي
کارخانادان سو ايشدي
الي داواتلو اوغلان
مکتب خانادان چيخدي
*****
دامدا دوروب اوٍچ گؤزل
داميي دؤورونو گزر
بيريسي منيم ياروم
ايکيسي وئيلان گزر
*****
او تاغايا اوتاغا
قارداش بويور اوتاغا
قوي مني اؤلدورسوله
جان باشييه صداغا
*****
ماشون گلدي داياننو(داياندي)
آبو رنگه بوياننو
ماشونلاريي سسيننن
قارداش جانوم اوياننو
*****
آق کؤينک ارخه سيننه(ارخه سينده)
صدف وار يخه سيننه
من تانورام يارومو
خادوملو مؤحله سيننه
*****
تهران يولون سؤکرم
آقجا نخود اکرم
قارداش گليب گئچنده
جيبينه دئررم تؤکرم
*****
دسماليي بوٍکوم بوٍکوم
قاچ آراسون گوٍل تؤکوم
قارداش بيزه گلنده
اگيل يوٍزويدن اؤپوم
*****
آفتافا قوم قوم ائيلر
قارداش تهراندا نئيلر
آغير توٍفئنگ چيگنينده
دؤولته خيدمت ائيلر
*****
آفتافانو دولدوردوم
دولدوردوم دالدا دوردوم
دئلله قارداش گلِري
گؤزلريم دولاندوردوم
*****
آفتافا ديزيم اوٍسته
ييخيللم يوٍزوم اوٍسته
دئلله گلِر قارداشوم
موشتولوق گؤزوم اوٍسته
*****
ماشون گلِر قيرميزي
ايچينده تهران قيزي
من ايسدِرم او قيزي
داداقلارو (ياناقلارو) قيرميزي
*****
کيشي کيشي دامدان گلر
سيتارا حامامدان گلر
دئمه ديم گئدمه اره
دوٍشره ي درد-سره
*****
ايش اوٍسته تاراخ چاللام
سسيم زيردارا چاللام
دئلله قارداش گلِري
اؤزوم الواردان ساللام
*****
عميم اوغلو اريکدي
يئمنم تَبَرليکدي
عميم اوغلوندان سارو
باغروم دليک دليکدي
*****
تهرانيي يوللاروندا
ساغوندا سوللاروندا
جوٍت قورباني کسرم
قارداشيم قوللاريندا
*****
قيزيل گوٍلو دئرللر
مخمل اوٍسته سئرللر
خوش حالونا او قيزيي
سئوديگينه وئرللر
*****
ککليگم بسته ککليک
اوخور قفسدهککليک
اتي کاباب ائيلرم
يوللارام دوستا ککليک
*****
خودام مني قوش ائيله
قَنَتيم(قاناديم) گوٍموش ائيله
هر يانا گئدر قارداش
يانونا يولداش ائيله
*****
توٍفئنگيم اوٍجو نيشدر
ضربلر يوٍرگيمده ايشلر
اودو گلدي باهار قيشلر
قئييد گل ايجباري اوغلان
*****
قارا قويون قاشدادي
بيزيم ائمميز باشدادي
نامرد اولاي زنداداش
حله قارداش ناشدادي
*****
آقآلماني يييهللر
يييهللر توٍرش دييهللر
آجيغييا گلمهسين
جوانا سؤز دييهللر
*****
داغدان انديم دوٍزه من
قوناق اولدوم قيزه من
اينجيميشم کوٍسموشم
داها گلمم سيزه من
+ نوشته شده در دوشنبه یکم تیر ۱۳۸۸ساعت توسط اسدالله امیری
|
