قارا گونئی

ای آقالار جان جسددن چیخاندا

قووم قارداش بیزی دئسین آغلاسین

قبریمی قازسینلار یول کیناریندا

گلیب گئدن دووا وئرسین آغلاسین

چون جوان اؤلورم عالملر بیلسین

دوستلاریم آغلاییب دوشمنلر گولسون

رفیقلریم قبریم اوستونه گلسین

قوجا جوان پیر و جوان آغلاسین

توی حناسین قویمامیشام الیمه

اجل خلعتینی سالدی بوینوما

نامامی یئتیرین منیم ائلیمه

ائل و طایفام فامیللریم آغلاسین

اوزاخلاشدی یار بیزیمنن آراسی

سینه مده سیزیلدار هیجران یاراسی

بیر درده دوشموشم یوخدور چاراسی

ارسطو افلاطون لقمان آغلاسین

یار الینه گئچیرتیدیم اللریم

اگم بوداغینی درم گوللرین

خبردار ائیله یین گنجه ائللرین

گنجه شوشه داغیستانلار آغلاسین

کرم دییه ر نکام گئتدیم دونیادان

لاچین لار تک زیندان اولدوم لووادا

نامامی یئتیرین آتام زییادا

آتام کیمی یوردو ویران آغلاسین