قارا گونئی

مست و مستانه یم اوزومدن بیخود
شراب عشقیندن ایچمیشم ودود
پروانه یم فانوس اخفاده مقصود
قالماییب آرامیم ص ب ر

صبر جامه سینی چاک ائتمیشم من
عاشیقام عشقی ادراک ائتمیشم من
محبت جعده سین پاک ائتمیشم من
دگمز آیاغیما ح ج ر

حجرتراش فرهادام من جبلده
هجوم ائدیب غم قالمیشام قبلده
شیرین الفتینی ساخلارام الده
شیرین گلمز گلیر ش ک ر

شکر سئومز فرهاد سئور شیرینی
ایستمز اجماع- حور و پرینی
عاشیق اولان بگلر عشقین درینی
معشوقوندان ائیلر ط ل ب

طلب ائیلر محبت شرابین قانسین
یول آزماسین لبدن امسین دادانسین
تیلیم شیکسته دیر قویما بودانسین
باشدان باشا چولا ز ل ف
منبع: حکیم تیلیم خان دیوانی/ اسدالله امیری/ 1386/ نشر نوید اسلام/ قم

گویول سئومز هر بیر گوزه لی چیندن
گتیرسه لر یوز مین گوزه لی چین دن
سنی سئودیم یوز مین گوزل ایچیندن
بولبول گزر بیر گول ایچین مین باغی

شیکار گلیر بره سیندن یاراشماز
کامل اولان اوز حددیندن یار آشماز
بیر گونوله ایکی سئوگی یاراشماز
باغبان سالا البت اولور مین باغی

زندگانلیق توسنینی مینه سن
سن بو ایلی یئتیره سن مینه سن
یار صدرینده دوگمه دوزدور مینا سن
گول جامه یه یا نصب ائیله مین باغی

عندلیب تک معتقد اول گوله سن
تیلیم شاید شاد اولاسان گوله سن
مطلبییی تشبیه ائله گوله سن
نه ضروردور دولاناسان مین باغی

منبع: حکیم تیلیم خان دیوانی/ اسدالله امیری/ نشر نوید اسلام/ قم/ 1386