آنام و آنادیلیمیز
آنامدان اويرهنيرم
بسلهمهلري بيربير
نازلامالاري بيربير
اوخشامالاري بيربير
آنام مدنيتين
توكنمز منبعي دير
(كيان خياو)
1- ننهم منه دئييردي: " سن اوشاقايكن سنه سوت وئرن وقت قاقاييي(بابانبن) بيردوستو منه دئدي: اوشاغا سوت وئرنده همّيشه دستيمازيي اولسون. اوننان سورا من دستيمازلو سنه سوت وئرديم". جمعه گونو 15/9/87 ده تئزدن قئيلان آستي (قاهوالتي)يئيهن زامان ننهمه وئرديگيم بير ليوان سوت ياريمچيليق قالدي. او تكجه سوتون ياريسيني ايچهبيلدي و سوتو ايچركن منيم قوجاغيمدا تانري رحمتينه قوووشدو.
2- گئچن نئچه ايللرده آنامين ريه خستهليگي اولدوغونا گوره خستهخانالارا گئتديكده اورانين آداملارينا ايلك تاپشيرديغيم سوز بو اولاردي: "ننهم توركجهدن باشقا بير ديل بيلمير. يا اونلا توركجه دانيشماليسينيز يا تورك امكداشلارينيزدان يارارلانماليسينيز". هرچند منيم بو ايستهگيم بعضيلري طرفيندن قارشيلانيب و بعضيلرينيده قارشيليغا گتيريردي.
3- ننهمين اولوموندن سونرا، سيد حيدر بيات بئله يازدي: ننه اولور گلن ايل آنلامدان دوشور، تيليم خان آنلامدان دوشور. حسين حيدري ده ننهلرين ياشاتمالاريني، ياشاماغا بويوك بهانه بيلدي. بعضي آذربايجان يازارلاري، قومدا ياشايان تيليم خان وورغونلاري، قاشقايي يازارلاري، خلج يازارلاري طرفيندن ده باشساغليغي گلدي كي هاميسينا تشككور بورجلويام.
4- بو گون فوريه آيينين ايگيرمي بيري، اسفندين اوچو، آناديلي گونودور. هر ايل آناديلي اسفند آيينين ايكيسي اولدوغونا گوره، دوننده منيم ايچين نئچه قيسا مئساژ گلدي:" اسفندين 2سي (دونيا آناديلي) گونو موبارك. آناديلي ديللرين آناسيدير". باشقا بير مئساژدا اورمودان گلدي: "سلام، دده كاتب دونياسين دگيشدي". بو خبر دونياليق آنا ديلي گونونده ان آجي خبر اولابيلريدي. دده كاتب اورمونون قولونجو كنديندن سوننو مذهبلي بير آشيق و دده اوزانيميزايدي. او دده تيليمخانين بعضي قيفيلبندارين آچاجاغيدي. اونون اولومونو آذربايجانا باش ساغليغي وئريرم. يازيمين سونوندا دده كاتبدن بير شعري تقديم ائديرم.
اوستا قارداش گل منايله خوش اوتوراق اوز به اوز
شعريميزين سونلاريندا دوردجه ديلدن دانيشاق
نه عضودور اينسانلاردا هر شي اونونلا گورونر
عرب عين، فارسي چشم، كوردو چاو، توركو گوز
ايلگيلي يازيلار:
