قارا گونئی

مرغئی ده پاییزین بیر و ایکنجی آیلاریندا کورا قالارلار. کورا قالاماق نه دیر؟ باغلاردا اولان قورو کولوخلارلا(کولوخ= کسسک) بیر مخروط شکلینده (کورا) دوزه لدرلر. کورانین آشاغیسیندا اودون توکمک ایچین بیر آغیز قویارلار. کورانین یوخاری طرفینی ده یانی مخروطین اوجونو بیتیرمه ییب و کورانین آغزینی آچیق ساخلارلار. کورانین ایچینده آلوشدوروق آدلانان تئز یانان اوت علف له اوت یاندیریب و آغاج توکوب کورانی قیزدیرارلار. کورا قیزاندان سورا یانی کولوخلار قیرمیز اولاندا کورانین ایچینده کی کوللری ائشیگه چیخارتیب ( چیخارتماسان دا اولار) یئرآلما- چوغوندر- سوغان و باشقا یئمک لری کورایا آتیب کورانی یاتقوزارلار. یانی کورانین قیزمیش کولوخلارینی آغاج یا بئل یا باشقا شی له دوگوب اوستونه ده تورپاق توکرلر تا کورانین ایسدیسی چیخیب گئتمه یه. ۳۰-۴۰ دقیقه دن سورا کورانین بیر طرفیندن دئشیب بیر کورا ایچینده کیلره باخیب پیشیب یا پیشممه سیندن خبردار اولاندان سورا پیشیبسه کورانی دئشیب یئرآلما-سوغان - چوغوندرلری چیخاریب دوز توکوب یئیه رلر. کورانین ایچینده کیلرین پیشمه سینی کورانین قوخوسوندان(ایی سیندن) یا دا بیر یاش داش تورپاغین ایچینه قویماق و اونون نه زمان قوروماغینی گورمک له اویرنمک اولار. یئرآلمانین چوخ پیشمیشینه (یاری یانمیش یاری سالیم) قورونقاز دئیه رلر.